Luk 11 | MED | STEP | Wote ui ti kᵾn, Jisas elim kona tila atinga ropa murum. Wote, atinga ropa pora nduⱡnga kᵾn, elim nga kitip kᵾni wu ti ndi, Jisas kundpa, nimba mel, “Nuim ye! Unt, Jon wamp nu tindi wu ei ndi, elim nga kitip kᵾni wu kᵾⱡ, atinga mbo rundrum ei mel ku, nim ndi, tᵾn atinga mbo indᵾn ka!” nitim.

Luke 11

Jisas Ndi, Atinga Ruing Ei Mel Mbo Inditim

1 Wote ui ti kᵾn, Jisas elim kona tila atinga ropa murum. Wote, atinga ropa pora nduⱡnga kᵾn, elim nga kitip kᵾni wu ti ndi, Jisas kundpa, nimba mel, “Nuim ye! Unt, Jon wamp nu tindi wu ei ndi, elim nga kitip kᵾni wu kᵾⱡ, atinga mbo rundrum ei mel ku, nim ndi, tᵾn atinga mbo indᵾn ka!” nitim. 2 Wote Jisas ndi, wu nimbᵾ, kundpa nimba mel, “Enim atinga i etᵾk rᵾi! ‘Tᵾn nga Wuta o! Nim nga mbi wingti ei, tᵾpᵾn ou ndᵾmin.Nim nga wamp tᵾpa mumuk rᵾi uⱡ ei, wangga! 3 Akup rᵾk rᵾk ui mbila, tᵾn nga nuimin rᵾng mbᵾ nguiyo! 4 Tᵾn nga uⱡ kit mbᵾ pendkᵾn kili! Nambuⱡ emel, wamp mat ndi, tᵾn etᵾk kit mondᵾrmin uⱡ mbᵾ, tᵾn ndi, i ku etpᵾn, uⱡ kit mbᵾ, wak ronmᵾn. Nim ndi, tᵾn kandkᵾn, kui tana uⱡ mbun pi mbᵾ, tᵾn kᵾn oⱡa ui nᵾwangga, mon!’” nitim.

5 Wote Jisas ndi, elim nga kitip kᵾni wu ni kᵾⱡ, kandpa nimba mel, “Enim wu mormin kᵾⱡ nga ti ndi, ou rumbuldi elim nga wamp puⱡ ti nga manga ila mba, ropa rᵾt ndupa nimba mel, ‘Ang, na nga manga ila wu ponᵾng ti rumbuldi oⱡnga kᵾn, na ndi, wu ei rᵾng nguimp mel ti mon elinga, nim ndi, na bret raldika ngᵾn nᵾmp ont ei ka!’ nimba. 7 Wote, manga ila murᵾk moⱡum wamp ei ndi, nim kundpa, ‘Na mbun ngui ngᵾngi! Na kᵾn kangambuⱡa kᵾⱡ kᵾn, kor kumba ropᵾn pendpᵾn, ur pepᵾn pora ndumin. Na kapⱡa oⱡa moⱡᵾp, nim mel ti nguimp mel mon!’ 8 Ei kᵾn, manga puⱡ wu ei ndi, wamp elim nga ᵾngᵾn ti, wi ronum pᵾnt ei ka nimba, rᵾng mat nuwa tᵾpa ngui ngangᵾmba mon! Wote, pipil kuⱡi naⱡᵾpa epᵾp ropa, wi tᵾkrᵾk ropa enᵾmp kuⱡpa kᵾn, rut nimba kᵾn, rᵾng mawa em mbᵾ, kapⱡa ngumba mint. 9 Na ndi, enim ik kupa ti kundᵾp namp. Enim Got kᵾn waldᵾk, atinga rong ndam, mel mat enim ngumba. Enim mel ti kurung ndam, kapⱡa Got ndi, ora ndangga kᵾning. Enim ndi, kumba rok gep ndᵾng ndam, kapⱡa Got ndi, kumba tᵾndᵾmba. 10 Wamp pora, Got kᵾn atinga rok, waldᵾtmin mbᵾ, mel mat ngurum. Wamp mat ndi, mel mat kurᵾrmin mbᵾ, Got ndi, ora nduⱡnga kandᵾrmin. Kumba rok, gep ndurmin wamp mbᵾ nga Got ndi, kumba tᵾndᵾtᵾm. 11 Omba, enim nga kangambuⱡa mbᵾ ndi, tipamᵾl mbᵾ kundᵾk, oma mat, tᵾk ngui nᵾng ndam, wote tipamᵾl mbᵾ ndi, kimbuⱡa mat tᵾk nguing ei? Ei mon! 12 Wote, kangambuⱡa ei ndi, tipam kundpa kᵾi muⱡ tᵾkᵾn ngui nangga, wote tipam ndi, kimbuⱡa kelwa ti, tᵾpa ngumba ei? 13 Enim uⱡ kit mbᵾ nga puⱡ wamp mbᵾ ndi, kangambuⱡa mbᵾ, mel kai mat ngurmin. Uⱡ ei mel ku, enim nga Tipam wi muⱡ ila morum ei ndi, numan kai pilpa, waldᵾtmin wamp mbo Muⱡnga Wingti ngurum,” nitim.

Jisas Ni, Kur Kit Biyelsipul Mondpa Kongun Enim Nᵾtᵾng

14 Wote Jisas ndi, wu ti kur kit ndi, ropa kum ngurum ila ik ni nandpa itim wu ni, etpa titim. Wote wu ni, ik nimba elinga, wamp mbᵾ ndi kandᵾk, min ngᵾn mundrᵾng. 15 Wote, wamp mat ndi, nᵾk mel, “Jisas ndi, kur kit mbᵾ nga nuim Biyelsipul ei nga ronduⱡ ei, tᵾpa kur kit mbᵾ, ropa pep ropa mundnum,” nᵾtᵾng. 16 Wamp mat ndi, Jisas oⱡa tᵾk kᵾning pilik kᵾn, waldᵾk nᵾk mel, “Wu ei, Got nga ronduⱡ ila kongun mat em ndam, uⱡ rᵾpᵾndi ti etpa, tᵾn ora ndangga kᵾnmin,” nᵾtᵾng. 17 Wote Jisas ndi, wamp nimbᵾ nga numan pᵾtᵾng ni, kundpa nimba mel, “Kona tenda tila wamp rᵾⱡaip kat, rᵾk ila oi kan pendᵾk, el eng ndam, wamp mbo kᵾⱡ molk, ruⱡ pi nᵾping. Wote, wamp mema tenda kat palk, rᵾⱡaip raⱡ etᵾk molk, el eng ndam, wamp kᵾⱡ kit muⱡing. 18 Omba, Seitan nga rᵾⱡaip ei, palk raⱡ etᵾk, el eng ndam, wote ronduⱡ muⱡing ei? Enim ndi, na kundᵾk kur kit nuim Biyelsipul mondᵾp kᵾn, kur kit mbᵾ, makrᵾp mundunt ninmin ei nga nᵾnt. 19 Na kur kit nuim Biyelsipul ei, mondᵾp kur kit mbᵾ nᵾmp mundunt ninmin. Ei wote, enim nga wamp rᵾⱡaip mbᵾ, nam nga ronduⱡ ei, tᵾk kur kit mbᵾ, nᵾk tᵾk mundᵾrmin? Enim nga wamp rᵾⱡaip mbᵾ, etmin uⱡ ei ndi, ora ndupa, en enim kᵾn ⱡawa etmin. 20 Ei mon, Got nga ronduⱡ ei, na nguⱡnga kᵾn, na ndi, kur kit mbᵾ, nᵾmp tᵾp mundunt. Uⱡ ei ndi, ora ndupa, Got nga wamp tᵾpa mumuk rui uⱡ ei, enim kᵾn omba morum.

21 Omba, wu ronduⱡ purum ti ndi, el kupanda na tepa, elim nga mang keta rᵾp etpa morum ndam, elim nga mel mbᵾ, etpa poⱡ tᵾtᵾm. 22 Wote, wu ama ronduⱡ ti ndi, rᵾk omba wu ei ropa, pendpa el kupanda na, koiya na mel ronduⱡ nimba pᵾtᵾm mbᵾ, tᵾpa elim nga mel ambuⱡpa morum mbᵾ, tᵾpa wamp mbᵾ ngumba etᵾm.

23 Wamp nam ti, na kᵾn mᵾn muⱡi nambrᵾm ei, na kᵾn el puⱡa wamp morum. Wamp ti, na nga sipsip kᵾⱡ, na kᵾn tᵾpa mᵾk rui narᵾm ei, na nga wamp mbᵾ, ropa mbuⱡ mbaⱡ etᵾm.

Muⱡnga Kit Ei Aldpa Yant Orum

24 Wote Jisas ndi, nimba mel, “Omba kur kit ti ndi, wamp ti nga rukᵾr orunga moⱡpa, wote wamp ei, wak ropa mba, kona waka ti, kandᵾp tᵾp muⱡimp nimba purum. Wote, kona kai ti, kandpa ti natᵾpa kᵾn, nimba mel, ‘Unt na mur manga ila kelip pamp nimba kᵾn,’ mba kandrᵾm mel, unt murum manga ni, ou nduk, pᵾkaimp rok, kai etᵾk tetᵾng. Ni kandpa kᵾn, int mba, kur kit 7 kat kongun kit minal etᵾk, elim akᵾk oⱡa nduk etmin ni kᵾⱡ, el kaⱡpa tᵾpa, mepa oⱡnga puk, manga nila mukᵾr puk mormᵾn. Unt wamp ni, wei etpa moⱡpa, kit mundrum ndam, wote akil tepa wamp ei, ama kit minal morum,” nitim.

Wamp Kupa Ambulk Palk Muⱡing

27 Jisas ndi, wamp num pitim kona nila, Got nga ik puⱡ mbᵾ nimba murum. Ni kᵾn, amp ti, rᵾk ila murum ni ndi, Jisas wi ropa, kundpa nimba mel, “Amp ti, nim mepa aim ngurum amp ei, ambuⱡpa paⱡᵾmba,” nitim. 28 Wote Jisas ndi, nimba mel, “Wamp nam ti, Got nga ik ei, pilpa pep ropa, em wamp ei, numan mam ti, ngumba muⱡangga,” nitim.

Wamp Mat Ndi, Jisas Waldᵾk Uⱡ Rᵾpᵾndi Ti Tangga Kᵾnmin Nᵾtᵾng

29 Wamp mam ti, Jisas murum kona nila ok, mint morung. Jisas ndi, wamp nimbᵾ, kundpa nimba mel, “Akup nga ui ila wamp kit mat mormin kant. Wamp mbᵾ ndi, wi rok, Got nga uⱡ rᵾpᵾndi ti, etᵾp ora ndamba, kᵾnmin mint ninmin, ei ka! Na ndi, kanda uⱡ ti, etᵾp tᵾp ora ndui nᵾndimp mon! Unt Painui wu Jona nga uⱡ rᵾpᵾndi tenda ei, mint kᵾning. 30 Unt, Ninipa kona peng ila painui wu Jona ni, Got nga to rondpa moⱡnga, wamp ndi kandrᵾng. Uⱡ ei mel ku, akup ui ila Muⱡᵾl Wu Kupa ei, Got nga to rondpa ya rᵾk ila morum. 31 Wamp mbᵾ pora, kot iting ei nga ui ti, Got ndi, to ropa pinditim. Ui ila Sipa kona ila amp kwin ti, murum ei omba, wamp mbᵾ, kot iting kona ila anggilpa, wamp mbᵾ nga uⱡ kit akup etᵾk mormin mbᵾ, kot ila nimba. Nambuⱡ emel, amp kwin ei, mᵾi punt ronggᵾt moⱡpa, wote Solomon nga pilpa kungᵾndi ik kai nᵾtᵾm mbᵾ, pilmba pilpa urum. Ei mel, ya enim nga kona ila rᵾk wu ti morum. Ei ndi, Solomon tᵾpa mana ndupa, oⱡa orunga morum. 32 Wote Got ndi, wamp mbᵾ pora, kᵾmp tᵾmba ui ei kᵾn, Ninipa wamp kᵾⱡ, kot ila anggilik kᵾn, akup ui ila mormin wamp mbᵾ nga uⱡ kit etᵾk mormin mbᵾ, kot inding. Uⱡ ei, nambuⱡ emel, unt painui wu Jona ndi, Ninipa wamp kᵾⱡ, ik mbo inditim ei, tᵾngᵾnda pilik, numan ropᵾl rorung. Ei nga, akup ya rᵾk ila wu ti morum ei, Jona tᵾpa mana ndupa, oⱡa orunga moⱡpa, ik mbo endnim,” nitim.

Kᵾng Kᵾⱡ Nga Rᵾⱡang Ei

33 Wote Jisas ndi, ik ti nimba mel, “Wamp ti ndi, lam kiya kandpa, manga mukᵾr rat pol mana orunga, mo ropa mundi namᵾndrᵾm mon. Wamp mat manga ila kandᵾk, mukᵾr weing nᵾk lam kiya kandᵾk, rat pol oⱡa orunga mondᵾrmin. 34 Enim nga kᵾng ei nga mong ei, kai moⱡum ndam, kᵾng kᵾⱡ rᵾⱡang minal purum. Enim nga mong ei, kit moⱡum ndam, kᵾng kᵾⱡ pora rumbᵾⱡ morum. 35 Uⱡ ei nga, enim nga rᵾⱡang rukᵾr orunga morum ei, etᵾk kai mundᵾi! Tᵾpa kawa ndangga, enim nga rᵾⱡang rukᵾr orunga morum ei kumbᵾⱡmba. 36 Wote, enim nga kᵾng kᵾⱡ pora, rumbᵾⱡ ti muⱡi nambᵾⱡᵾm ndam, lam kiya rᵾⱡang purum ni mel, rᵾⱡang mint mba moⱡmba,” nitim.

Perisi Wu Na, Mi Ik Mbo Wu Mbᵾ Ndi, Uⱡ Kit Mbᵾ Etᵾng

37 Wote, Jisas ik mbo endpa, pora nduⱡnga kᵾn, Perisi wu ti ndi, Jisas elim nga manga ila rᵾng nᵾn, wi nilinga purum. Jisas mba, manga nila mukᵾr rat pol nila murum. 38 Jisas ni, ki ⱡumᵾi rᵾi narᵾpa, rᵾng nurum ila Perisi wu ni ndi kandpa, numan ou ndupa pitim. 39 Wote Jisas ndi, Perisi wu ni, kundpa nimba mel, “Enim Perisi wamp mbᵾ ndi, rᵾng normin mel mbᵾ, ekit orunga, ⱡumᵾi rok, eng nondᵾrmᵾn. Wote, enim nga numan rukᵾr orunga, uⱡ kit mbᵾ ndi, peka ropa petᵾm,” nitim. 40 Enim Perisi wamp wᵾlᵾ mbᵾ ye! Got ndi, enim nga kᵾng ekit orunga, etpa kai mundrum ndam, wote rukᵾr orunga etpa, kai mundi nᵾmᵾndrᵾm nda? 41 Wote, enim nga rᵾng normin mbᵾ nga rukᵾr orunga, tek mormin mel mbᵾ, wamp kurpa mat, tᵾk rapᵾndᵾk ngᵾi. Uⱡ i eng ei ndi, enim eng nomba.

42 Enim Perisi kᵾⱡ, pilik kai itᵾi! Pana kona mbila, kim na, rᵾng mat kᵾmp tᵾk, ki ti gu nduk, Got ngᵾi! Enim Got numan ngui uⱡ kun kai kᵾⱡ, wak rormin ei kelik, akup ronduⱡ mundᵾk, uⱡ kai kᵾⱡ etᵾk, wamp mat, wak rui narᵾk, wote mi ik mbᵾ pora, pep rᵾi.

43 Enim Perisi wu mbᵾ, pilik kai itᵾi! Enim atinga manga kel mbila nga kuimbal mint puk molk, wamp kel mbᵾ, mᵾk rok mormᵾn kona mbila, enim rawe iteing mint nᵾk etmin ei ka! 44 Enim Perisi wu mbᵾ, pilik kai itᵾi! Enim wamp on kut kona, mᵾi ila mo ropa, telinga kᵾn, wamp mat ndi, kᵾni nakᵾndᵾk ok, purmᵾn uⱡ ni mel etᵾk mormᵾn.

45 Wote, Jisas nitim ik ni, mi ik mbo wu ti ndi, pilpa moⱡpa, punt ropa, Jisas waldpa, nimba mel, “Ik mbo wu ye! Nim ndi, Perisi wamp mbᵾ, ik kundkᵾn nᵾn kᵾⱡ, tᵾn kunda ik mura ngᵾn ei ka!” nitim. 46 Wote Jisas ndi, punt ropa wu ni, kundpa nimba mel, “Enim mi ik mbo wu mbᵾ kunda, pilik kai etᵾk muⱡᵾi! Enim mi ik mbo wu mbᵾ ndi, uⱡ mbun mam mbᵾ tᵾk, wamp kel mbᵾ nguⱡina, mindil nok koma rormin. Wote, enim nga ki kot ila rᵾk nduk, tᵾk rᵾpᵾndi napᵾndᵾrmin ku. 47 Uⱡ ei, enim pilik kai itᵾi! Enim nga anda kouwᵾ mbᵾ ndi, painui wu mbᵾ, rok kondrung ei nga, akup enim ndi, painui wu kᵾⱡ nga on kona ei, mim etᵾk mormᵾn. 48 Unt nga anda kouwᵾmᵾn kᵾⱡ, etᵾng ei mel ku, akup enim ndi, uⱡ mbᵾ wamp mbᵾ, teing nᵾk orunga mint nduk, mormin uⱡ ei, nambuⱡ emel etmᵾn. Anda kouwᵾ mbᵾ ndi, painui wu mbᵾ, rok kondrung ei nga on kona mbᵾ, enim mim etᵾk mormᵾn. 49 Nambuⱡ emel, Got nga numan kun kai ei ndi, nimba mel, ‘Na ndi, painui wu na, nombuⱡa rung wu na mat tᵾp mundamba. Wote, wamp mbᵾ ndi, wu mat etᵾk kit mondᵾk wu mat rok kunding.’ 50 Got ndi, mᵾi ei puⱡ mondpa itim ui ei kᵾn, yant ndupa, painui wu rok kondᵾk etᵾng ⱡawa ei, akup ui ila wamp mormin mbᵾ, ⱡawa ei ting. 51 Unt, painui wu rok kondrung kᵾⱡ nga puⱡ mondᵾk, Eipel rok kondrung. Uⱡ ei, tepa mint orum. Wote, Sakaraiya rok kondrung ei, rat pol wingti ei kᵾn, manga kᵾkaⱡ wingti raⱡ nga rᵾk ting ila rok kondrung. Na ik kupa kᵾⱡ, enim kundᵾp nᵾnt. ‘Uⱡ kit etᵾng mbᵾ, punt romba uⱡ ei, akup ui ila mormin wamp mbᵾ ting!’

52 Enim mi ik mbo wu mbᵾ, pilik kai itᵾi! Enim ndi, wamp pilpa kungᵾndi ting ei nga kumba ki kᵾⱡ, tᵾk mo rorung ei ka! Enim kumba tᵾk rukᵾr pi napᵾk, wote wamp mbᵾ, pilpa kungᵾndi kandᵾk ting ei nga nombuⱡa mam kumba angᵾndᵾtmᵾn,” nitim.

53 Wote, Jisas ik mbo endpa murum kona ni, wak ropa puⱡnga kᵾn, mi ik mbo wu na, Perisi wu na mbᵾ ndi, Jisas kᵾn popᵾⱡ kolk, ik elpa elpa mat waldᵾtᵾng. Wu nimbᵾ ndi, Jisas ik mat ⱡawa etᵾk waldamina kᵾn, Jisas punt ropa, ⱡawa tangga kᵾn, imp muⱡmin nᵾk pilik nᵾtᵾng.